Toskanio (Toscana)
Lando	Italio
Ĉefurbo	Florenco
Areo	22 987 km²
Loĝantaro	3 729 641 (2018)

Toskanio (itale: Toscana, elp. /To'skana/) estas regiono de Italio.

Urboj

• Florenco (it. Firenze)
• Pizo (it. Pisa)
• Sieno (it. Siena)
• Luko (it. Lucca)
• Pistojo (it. Pistoia)

(...)

Kompreni

Tipa pejzaĝo de Toskanio, kun sinsekvo de montetoj, plejparte kulturitaj, disaj kamparaj domoj, cipresoj.

Toskanio situas en centra Italio - pli precize en ties nordokcidenta parto.

Okcidente, estas la Tirena maro, kun pluraj insuletoj, kiuj hodiaŭ estas parto de mara nacia parko. La marbordo estas plejparte sabla.

Norde, estas la nordaj Apeninoj, kun montoj ĝis ĉirkaŭ 2000m, tre krutaj en la Apuanaj Alpoj, pli mildaj en aliaj lokoj. Alia grava monto (ĉ. 1700m) estas en suda Toskanio: ĝi nomiĝas Amiato (it. Amiata, elp. /a'mjata/) kaj estas malaktiva volkano, kies glora tempo okazis antaŭ 300mil jaroj.

Sieno

Interne, inter la montoj, la maro kaj la orienta landlimo, estas plejparte montetoj. Tie troveblas la plej konata pejzaĝo de Toskanio, t.e. sinsekvoj de mildaj montetoj, kutime kulturitaj kun vinberĝardenoj, olivarboj, fruktarboj, legomĝardenoj ktp. Tie kaj tie videblas la sveltaj, malhelaj formoj de cipresoj, kiuj en Toskanio estas tre uzataj kiel ornamaj arboj. Kaj tie kaj tie videblas malnovaj, grandaj domoj, solaj aŭ duope, triope, ofte ĉe la supro de iu monteto.

Estas ankaŭ, kompreneble, urbetoj kaj urboj, kaj la plimulto el ili entenas mezepokajn monumentojn, ĉu preĝejojn, ĉu kastelojn, ĉu domegojn. Kelkaj estas tre famaj pro la abundo de tiaj monumentoj: Florenco, Sieno, Pizo, ktp.